O Grupo Municipal Popular presentou hoxe unha proposición na que se pide ao Goberno Local que paralice as axudas ao mobiliario urbano que subvenciona o Plan URBAN ata que se modifiquen as bases do prego de condicións.

Os populares reaccionaban con esta iniciativa tras escoitar as denuncias recibidas por profesionais do sector e tras comprobar que hai algún modelo de cadeira que aparentemente só produce un fabricante.

A proposición que presenta o Grupo do Partido Popular para debater no próximo pleno ten os seguintes puntos:

• Paralizar a concesión das axudas suxeitas ás "bases que rexen as axudas a empresas da zona URBAN para a instalación de terrazas, rótulos e mellora de fachadas" ata introducir as modificacións necesarias, para garantir a libre concorrencia de empresas fabricantes.
• Abrir de xeito urxente un período de consultas cos colectivos profesionais interesados no tema, asociacións de comerciantes e hostaleiros, para introducir as oportunas modificacións que melloren o actual marco normativo para que harmonice pero non uniformice, o mobiliario a utilizar.
• Unha vez feitas esas modificacións, abrir un novo prazo no que os hostaleiros e empresarios da zona URBAN podan solicitar as axudas previstas.