O portavoz do Grupo Municipal Popular, Joaquín García Díez, cualifica de conduta grave, que o Alcalde "envíe, por conta propia, unha carta ao Presidente da Xunta, en nome de todos os grupos políticos, sen antes acceder a concretar, nunha reunión cos portavoces, as prioridades da cidade".

Para os populares se xa resulta inadmisible que Orozco se negase a votar o pasado luns nun Pleno unha proposición que legalmente había que votar aínda "é máis intolerable e chocante" que sexa o Alcalde o que se erixa en portavoz de "as nosas opinións sen previamente celebrar a reunión que se lle pediu dunha forma cordial que convocase".

"El non é quen para falar en nome do Grupo Municipal Popular" insistiu García Díez á vez que recalcaba que o seu grupo non sabía cal era o contido do escrito que Orozco lle trasladou "no seu nome".

O portavoz popular recordou como onte se entregou no gabinete do Alcalde, unha carta persoal na que se lle pedía unha reunión para consensuar as prioridades de Lugo e expresou o seu convencemento de que Orozco mente cando di que non sabía nada deste escrito "con mentiras o único que consegue é perder a credibilidade de moitos lucenses que confiaron nel, preocúpalle e por iso actúa deste xeito".

Conduta rastrera.-

Os populares avanzaron que levarán este asunto á próxima xunta portavoces. O portavoz popular tamén informou que se dirixiu ao gabinete do Presidente da Xunta para comentar o incidente e facerlles coñecedores de que "a opinión contida nesa carta, aínda que se transmita no noso nome, non podemos subscribila, á vez que entendemos que con esta conduta rastrera o Alcalde retrátase como o que realmente é e dificulta cada día máis a convivencia democrática no Concello".

Hipocrisía política.-

Por outra banda o concelleiro, e presidente do Partido Popular, José Manuel Barreiro, afirmou que os socialistas de Lugo "tratan de lavar a súa mala conciencia cunha actitude de hipocrisía política".

O Partido Popular leva un mes gobernando e atópase con que hai buracos por todos os lados recalcou: "durante este tempo Orozco e a súa comparsa estiveron mudos, e en ningún momento víuselles defender os intereses dos lucenses".

Para os populares, con Alberto Núñez Feijóo hai unha garantía de que a Xunta vai cumprir con Lugo porque é unha persoa seria "que cumpre o que di" afirmou Barreiro.