"Orozco tivo un arrebato", está nervioso porque "non ve claro o seu futuro político, e porque o balance da súa xestión é moi pobre a pesar de levar dez anos no goberno". Deste xeito respondía o portavoz popular ás declaracións do Alcalde desta mañá.

Para o portavoz popular Orozco "intenta desviar a atención dos verdadeiros problemas que hai no seo do seu goberno lanzando ataques persoais". As declaracións do Alcalde son pouco cribles xa que se contradin con outras afirmacións que efectuou na súa primeira campaña electoral, no ano 1999, onde puña a Joaquín García Díez como exemplo de bo xestor, chegando a dicir que "foi o mellor Alcalde que tivo Lugo".

O portavoz do Grupo Municipal Popular, Joaquín García Díez, pide a Orozco que sexa rigoroso e poña sobre a mesa os resultados da súa xestión durante estes dez anos como Alcalde de Lugo fronte aos catro nos que el presidiu o goberno local.