O portavoz do Grupo Municipal Popular, Joaquín García Díez, pediu esta mañá ao Alcalde que dea explicacións polos distintos reaxustes que se están producindo no seo do goberno local que preside Orozco. Os populares están preocupados pola "paulatina e constante descomposición do goberno socialista do Concello de Lugo".

Nese sentido avanzaron que presentarán unha iniciativa para que Orozco aclare os cambios no seu goberno e tamén lle pedirán que adiante o debate sobre o estado da Cidade xa que temen que "con todos estes axustes paralícese o xa lento ritmo de traballo do goberno local".

En rolda de prensa, o portavoz popular enumerou distintos exemplos dos últimos cambios no organigrama de Orozco: os máis recentes foron a adscrición da concellaría de mocidade á de emprego, o nomeamento dunha nova xerente para EVISLUSA, a marcha do concelleiro Liñares e as pugnas internas que desatou isto no Goberno Local, e ata recordou a imputación do portavoz do seu grupo, José Rábade na trama das multas, facendo fincapé do último caso dado a coñecer nas últimas horas, o do "cesamento ou dimisión do director xeral de novas tecnoloxías".

García Díez afirmou que "estamos ante unha crise de goberno", e non é crible a afirmación de Orozco xustificando estes axustes "como unha medida para modernizar a xestión local". "O Alcalde pretende ocultar que algo funciona mal. Está no seu dereito a facer cambios no seu goberno pero ten que explicalos"

A soidade do alcalde.-

A Joaquín García Díez tamén lle chamou a atención que o Alcalde se postule "el mesmo" para repetir como candidato á alcaldía, e cre que "evidencia a súa soidade e inseguridade".