O Grupo Municipal Popular solicita ao goberno de Orozco que tome medidas para eliminar os numerosos niños das pombas do pavillón polideportivo do Instituto de Casás. A queixa fíxose no último consello escolar do centro. A comunidade escolar está preocupada polo estado no que a miúdo se atopa esta instalación xa que hai excrementos por todas partes.

A petición do PP é urxente porque estes días celébrase o campionato provincial de futbito Liceo a Paz. Alicia Pena explicou que "as portas do pavillón están estragadas polo que os paxaros entran e aniñan dentro deixando todo perdido".

O pavillón que está no punto de mira é o lugar onde se imparten clases de educación física, e a actividade nesta instalación é continua xa que a partir das catro da tarde hai moitos mozos xogando.

A concelleira popular tamén solicitou que se cambie o valo que rodea o parque de xogos infantís, xa que o peche actual "é un simple aramado que está moi deteriorada, o que supón un perigo para os nenos que xogan na zona. Os propios mestres tiveron que coser con cordóns o alambrado para impedir que os nenos escapen polos buracos", puntualizou Pena Murias.

Para rematar o PP chama a atención ao goberno de Orozco por incumprir compromisos adquiridos co centro de Casás: non colocou unha protección para evitar que os pequenos salgan á calzada; non limpou os canlóns, o que provocou filtracións en varias aulas...