• O goberno é incapaz de controlar o lixo que se deposita neles. No de Mazoi é frecuente atopar todo tipo de residuos.
• Sobre a posta en marcha dos novos puntos limpos na zona rural os populares presentarán un rogo para que se consensúen cos veciños a súa localización.

O Grupo Municipal Popular criticou a incapacidade do Concello de Lugo na xestión dos puntos de recollida de plásticos agrícolas do municipio. A denuncia fíxoa o concelleiro popular Manuel López nun punto destinado exclusivamente á recollida dos plásticos que os labradores utilizan na súa actividade. "Con todo aquí é frecuente que aparezan cadeiras de brazos, electrodomésticos, rodas de tractores, cristais e caixas con froitas e verduras. Está claro que o Concello é incapaz de vixiar e sancionar aos que utilizan este punto limpo de Mazoi como vertedoiro", lamentouse Manuel López.

O concelleiro popular reproba a lentitude do goberno socialista á hora de pór coto a esta situación: "os veciños descoñecen o funcionamento destes puntos: frecuencia de recollida, materiais que se poden depositar...".

O edil popular indicou que a localización fíxose a criterio do pedáneo sen contar coa opinión do resto dos veciños: "Simplemente trasladándoo uns 200 metros non se prexudica a ninguén porque quedaría habilitado nun monte veciñal, e o custo sería o mesmo".

Nese sentido o Grupo Popular anunciou que presentará un rogo para que o goberno consensúe cos veciños a localización dos puntos que se prevexan construír proximamente.

Vertedoiros incontrolados.-

A pesar de que os puntos de recollida de plásticos que hai no Concello teñen cascallos e aveños domésticos seguen aparecendo numerosos vertedoiros incontroladas. Entre os últimos que detectou o PP destacan o que hai entre o Burgo e Poutomillos onde unha chea de plásticos están tirados xunto ao camiño de Santiago.