O Grupo Municipal Popular fixo público o seu malestar pola situación na que ano tras ano queda o Parque de Rosalía tras a celebración das festas patronais de San Froilán.

Para a concelleira Teresa Taboada "non se comprende que unha empresa privada faga uso dun espazo público sen devolvelo ao seu estado anterior unha vez finalizadas as súas actividades".

O Concello de Lugo é o responsable de esixir aos feirantes que tomen as medidas oportunas para non danar o Parque de Rosalía, pero se ve que nin exerce esa función nin a suple cos seus propios recursos, o que sería un "mal menor, aínda que non o consideramos unha boa solución xa que se gastarían recursos públicos para emendar uns danos causados por entidades privadas".

Meses logo de San Froilán, e cando o Parque de Rosalía tería que estar mostrando o seu mellor aspecto de face á primavera e a melloría do tempo, aínda ven restos de instalacións que fai meses foron retiradas. "Non é de recibo que se fagan grandes plans para o Parque se nin sequera son capaces de mantelo no día a día".