O Grupo Municipal Popular presentará unha iniciativa no próximo Pleno para apoiar ás máis de 150 familias de celíacos do Concello de Lugo. A concelleira popular Sofía López Linares, celebrou hoxe unha reunión cunha representación da asociación de celíacos de Lugo para explicarlle en que consistían as propostas que o seu grupo defenderá no próximo Pleno.

A axuda que se propón podería ser económica ou ben material a través de lotes mensuais de produtos alimenticios básicos sen gluten. A idea é que o Concello estableza un apoio baremado de axudas ás familias con escasos recursos económicos que teñan algún membro que padeza a enfermidade.

Outro aspecto desta proposición sería promover unha campaña encamiñada a facilitar a vida dos celíacos na nosa cidade, dando apoio á creación de menús específicos en restaurantes así como fomento da creación de seccións para celíacos en establecementos de alimentación.

Sofía López considera que o Concello demostrou pouca sensibilidade con este tema: Como exemplo puxo os almorzos saudables que promove a concellaría de educación. O Concello pediu aos pais que comunicasen se teñen fillos con algún problema deste tipo, e unha vez foille facilitada a información, no canto de preparar menús adaptados excluíron aos nenos do programa.

Os celíacos son persoas que non toleran o gluten polo que ven obrigados a comprar produtos especiais moito máis caros do habitual. Por exemplo un quilo de fariña sen gluten chega a custar cinco euros fronte ao euro escaso que se paga pola fariña normal.

A cesta da compra da semana dunha familia cun celíaco sobe máis de trinta euros, polo que ao final do ano, en produtos específicos da súa dieta chegan a pagar 1600 euros máis que unha familia que non ten un enfermo celíaco.