O Grupo Municipal do Partido Popular pedirá explicacións na próxima comisión de Asuntos Sociais, que preside a popular Sofía López Linares, sobre os "axustes" que o Goberno Local pretende introducir no orzamento municipal de face a potenciar a política social.

A concelleira popular lamenta que Orozco perdese á oportunidade que lle brindou o PP, no mes de xaneiro, de facer un plan de traballo similar ao que agora expón: "O Alcalde e os seus, facendo gala da súa prepotencia, rexeitaron unha proposición que levou a Pleno e na que a formulación era igual que o que agora se pretende levar a cabo, só que con participación".

Sofía López Linares recordou que o que pedía o Partido Popular era elaborar un Plan de Axuda Social que operase mentres dure a actual crise económica. Coa idea de abrir a participación suxeríase que estas medidas contasen co visto e prace de ONGs, asistentes sociais e outras administracións implicadas.

Para a concelleira popular a actitude dos socialistas vai contra a participación nun tema tan sensible, e prefiren impor o seu criterio e non escoitar a ninguén, facendo as cousas sempre de forma unilateral. En aras a que os axustes orzamentarios para potenciar a política social en Lugo sexan transparentes a concelleira popular pedirá que se especifiquen as partidas das que se detraen cantidades e ás que reciben os fondos e cales son os prazos previstos para desenvolver estas medidas.