O deputado nacional do PP, Joaquín García Díez, anunciou esta mañá que solicitará a comparecencia do ministro do Interior, Alfredo Pérez Rubalcaba así como a do Director Xeral de Tráfico para que expliquen o caso da presunta trama que se dedicaba a sacar multas na Xefatura provincial de tráfico de Lugo.

Os populares reaccionaban, con esta petición, despois de que se fixese público que un cargo político do PSOE ten que declarar ante o xuíz "parécenos un tema grave que convén esclarecer canto antes. É preocupante que Lugo sexa noticia por este tipo de cousas", puntualizou o deputado popular.

Aínda que García Díez expresou o seu máximo respecto ao xefe de tráfico de Lugo, imputado nesta causa, "non vou caer na trampa de sinalar co dedo a ninguén en tanto non sexa obxecto dunha actuación xudicial" insistiu na necesidade de que se dea unha explicación por parte do Goberno "xa que nas últimas datas, producíronse imputacións e ata detencións de xefes de tráfico noutros puntos de España".