O Grupo Municipal Popular critica a adxudicación que hoxe levou á mesa de contratación dunha asistencia técnica para a xestión da depuradora de auga potable. O contrato, dun ano prorrogable, suporá un custo total de 1,5 millóns de euros, unha cifra que os populares consideran "un disparate" e que podería rebaixarse en aproximadamente un 30%.

A xuízo do portavoz do Grupo Popular, Joaquín García Díez, hai unha "moi mala xestión do ciclo da auga de Lugo. Deliberadamente o equipo de Orozco aparcou a negociación co PP para constituír unha empresa mixta e optou pola privatización". Os populares cren que as condicións que presentaron "non encaixaban cos plans do goberno socialista" que prefire "PRIVATIZAR" antes de chegar a acordos co Partido Popular, na liña das numerosas empresas mixtas que se constitúen en España".

García Díez considera que esta decisión de Orozco prexudica ao Concello, xa que "os lucenses ademais de asumir o pago de 1.552.000 euros anuais á adxudicataria do servizo terán que facer fronte a unha das partidas máis importantes da xestión da potabilizadora: o custo de enerxía eléctrica dos motores da planta".