Esta situación de falta planificación, lonxe de corrixirse, repetiuse o sábado. Os efectivos realizaron as súas quendas habituais sen ningún reforzo a maiores. Enrique Rozas subliñou como "o propio sábado, a luz do día fixo visibles o gran número de danos ocasionados polo temporal, e os sete bombeiros que había de servizo estiveron ocupados cunhas 30 saídas, quedando o parque de bombeiros todo o día sen efectivos. No cuartel só había unha persoa para atender o teléfono".

A falta de previsión é unha constante e non se corrixiu nin sequera na noite do domingo. "Por exemplo, habendo alerta e tres centímetros de neve de espesor, non había cadeas para colocar nos vehículos".

Para rematar Enrique Rozas felicitou o traballo realizado por todos os efectivos da policía local e bombeiros que estiveron de servizo, así como aos voluntarios de protección civil, á fronte do cal estivo o seu responsable que, con gran previsión, montou un dispositivo específico para cubrir esta alerta.

Petición do Partido Popular no Congreso.-

Os deputados galegos do PP presentaron unha Proposición non de Lei no Congreso esixindo ao Goberno a declaración de zona catastrófica para as áreas de Galicia, e doutras comunidades do norte de España, afectadas polo temporal de choiva e vento que arrasou a comunidade autónoma os días 23 e 24 de xaneiro, así como a aprobación dun real decreto que con carácter urxente inclúa un paquete de axudas para os afectados polas cuantiosísimas perdas que padeceron.

Para o PP, o Goberno debe proceder de inmediato a unha valoración e avaliación completa e inmediata dos danos producidos e dar unha resposta o máis rápida posible aos afectados e ás administracións públicas cuxos bens ver danados polo temporal, talles como dependencias municipais, infraestruturas, abastecementos, camiños, etc.

Os populares cren que o real decreto do Goberno debe contemplar, así mesmo, non só achegas económicas que palíen as importantes perdas sufridas, senón tamén créditos brandos que permitan aos particulares afectados recuperar, canto antes, as súas explotacións, negocios e vivendas.

A falta de luz eléctrica afectou a medio millón de fogares galegos, calcúlase que botou a perder miles de toneladas de produtos de mar que moitas empresas tiñan almacenados, así como centos de toneladas de alimentos procedentes da matanza que moitas familias tiñan nos seus conxeladores e miles de litros de leite que non puido ordeñarse pola falta de xeradores. Por non falar das perdas da flota pesqueira que non puido saír a faenar e que viu como moitos dos seus barcos sufrían desfeitas polo temporal.

Así mesmo, o PP entende que han de axilizarse as actuacións do Consorcio de Compensación de Seguros naqueles supostos nos que a causa dos danos entre dentro do seu ámbito de cobertura.

Os populares galegos en Madrid consideran que o Goberno debe actuar coa mesma dilixencia coa que actuou en casos de inundacións e temporais noutras comunidades autónomas e espera que as axudas cheguen canto antes aos afectados de Galicia.