O Grupo Municipal Popular, a través da concelleira Teresa Taboada, pídelle ao equipo de Orozco que aclare cal é o prazo previsto para que os veciños poidan gozar do Parque dous Paxariños. Nese sentido anunciou que formulará unha batería de preguntas coa idea de coñecer en que situación están os traballos deste área de esparexemento que Orozco prometeu que se podería usar en 2004.

A edila popular considera moi optimista a visión do equipo de goberno que recentemente declarou que só quedaban "pequenos remates que debe facer persoal especializado".

A popular explicou que zonas próximas ao anfiteatro son un auténtico bulleiral; aludiu ás profundas pegadas dos vehículos de obra, presentes na práctica totalidade dos camiños, dificultando o paseo.

Teresa Taboada tamén puxo o acento en que non se fixo ningún traballo de revegetación naquelas zonas das que se tomaron préstamos de terra vexetal para utilizar nos parterres. Estas zonas presentan unhas fochas importantes, e uns noiros moi altos e empinados que a auga de choiva arrastra cara ao río Rato.

Varandas provisionais, tapas de distintos servizos sobresaíndo máis de 15 centímetros, canalización á vista nalgúns tramos, restos de materiais... forman parte, a día de hoxe da paisaxe deste parque.

En opinión da edila popular aínda queda moito traballo por facer "á vista salta que aínda con man de obra abundante, a tempo completo, e traballando arreo, como mínimo tardaríase uns tres meses en ter a obra concluída".