O deputado nacional do PP de Lugo e portavoz do Grupo Municipal Popular, Joaquín García Díez, cualificou de "moi preocupantes" os datos oficiais do paro coñecidos hoxe. A xuízo do congresista lucense as cifras revelan a incapacidade do goberno de Zapatero de ofrecer solucións á crise: "Aquí mesmo, en Lugo, xa son palpables as consecuencias dos erros do PSOE; fai uns días asistiamos ao peche dun concesionario de automóbiles no CEAO, tamén estes días saltaba a noticia dunha posible redución de postos da factoría de Alcoa".

"Hoxe é un día funesto para o país, xa que se acaba de rexistrar o peor dato da historia do paro con 3.128.963 persoas rexistradas nas listas do INEM".

Para o deputado popular e portavoz do Grupo Municipal Popular é tráxico que Lugo acabe o ano con 2.202 parados máis que en 2007 e cunha caída, na media de 2008, dun 2,3% do número de afiliados á seguridade social.

García Díez puxo de manifesto que "víase vir a destrución de postos de traballo" deixando entrever a preocupación pola garantía do futuro das pensións.