Tras as declaracións da representante do Equipo de Goberno socialista na comisión de Servizos Sociais, que se celebrou de xeito urxente esta mañá, confírmase "a falta de control das actividades que levan a cabo no viveiro municipal".

A reunión desta mañá foi convocada pola súa presidenta, a popular Sofía López, quen lamentou que os socialistas só comparezan "forzados" pola oposición. Na súa opinión, "no mesmo momento no que o caso saíu á luz requiríanse unhas explicacións, claras e urxentes, xa que é preocupante a imaxe que se dá a opinión pública da institución que representamos".

O Partido Popular non xulga a ninguén, pero considera que o Concello ten mecanismos suficientes para controlar "as actividades que se desenvolven no viveiro de empresas e que gástase o diñeiro público do CEI".

A presidenta da comisión mostrou a súa desagrado porque, unha vez máis, reduciuse o tema a un novo desencontro entre dous partidos que gobernan en Galicia, e que en Lugo asistimos ao feito de que "cando o BNG denuncia o caso, o portavoz socialista no canto de asumir responsabilidades parece máis preocupado por rebotar o problema á Consellería de Industria".

O PP insistiu na comisión en que, dentro do regulamento que se está elaborando, debería figurar "aínda que sexa a touro pasado" unha cláusula específica que limite as actividades que atenten contra a dignidade das persoas, ou os principios de igualdade e tolerancia.

Sofía López recordou que casos como este tiran pola borda o traballo e o diñeiro que se gasta para elaborar plans de igualdade. No Concello de Lugo tan só na publicación e deseño de 1500 exemplares do Plan de Igualdade investíronse 6.399,72 euros. A edila popular preguntará se algún destes exemplares chegou ás mans das empresas do CEI.