O Grupo Municipal Popular propón que o Concello acondicione un acceso ao campo da Polvoreira pola rúa Novo Freire, xa que na actualidade os usuarios destas instalacións para entrar ao recinto deportivo ven obrigados a atravesar o Colexio das Mercedes.

O consello escolar deste centro xa alertou en numerosas ocasións dos problemas de seguridade e limpeza que ocasiona este paso "ao estar a porta aberta de día e de noite entra quen quere. As queixas de limpeza e de seguridade repítense sobre todo as noites de movida, porque utilizan este espazo para celebrar botellóns".

Alicia Peña explicou que presentará unha iniciativa ao pleno de face a solicitar que "a entrada actual da Polvoreira pola rúa Montirón sexa de uso exclusivo para o centro; e que o Concello estude habilitar unha entrada permanente que ben podía ser acondicionando o acceso provisional que utilizaban os camións cando se fixeron obras no campo da Polvoreira". Esta porta só se abre cando se celebra un partido importante e prevese unha afluencia de público considerable.

A concelleira popular explicou que esta é unha vella demanda do Colexio das Mercedes e indicou que "logo de recibir promesas do equipo de Orozco de que lles ían a solucionar o problema as cousas seguen igual".

Fai quince días que a APA enviaba un escrito ao Subdelegado do Goberno pedíndolle a súa colaboración para resolver esta situación, pero ata agora non houbo resposta de ningunha administración