A concelleira Sofía López acusa de incompetencia ao equipo de Orozco por ser incapaz de axilizar as axudas de dependencia que se solicitaron nos centros sociais de Lugo: "Fai un ano, en resposta a unha batería de preguntas do Grupo Popular, a responsable de área, Carmen Basadre, informou que o Concello tramitaba expedientes. Pasou un ano, e só se resolveron 42 solicitudes de grandes dependentes, e nada se sabe das correspondentes aos graos I e II".

Para a concelleira popular leste é un novo exemplo do fracaso da política social do equipo de Orozco, ao que "non lle doen pezas" en gastar o seu tempo, e 12.000 euros dos lucenses en botar unha partida de trivial nun día, en lugar de facer un seguimento exhaustivo e axilizar o pago das axudas da dependencia.

A concelleira popular, Sofía López, quere saber que pasou coas máis de mil peticións entregadas no Concello e pregúntase se houbo algunha reunión de coordinación, aparte da celebrada o 30 de xullo de 2007, con responsables de vicepresidencia para concretar a resolución de expedientes de dependencia.

A oficina da dependencia.-

O Grupo Municipal Popular cre que toda a situación demostra a importancia de que o Concello teña unha infraestrutura propia que canalice todo o tema da dependencia.

"A dous anos da implantación da lei da dependencia Lugo atópase con esta triste realidade, froito da inoperancia, a descoordinación e en definitiva do desinterese tanto do goberno de Orozco como do Bigoberno da Xunta".

O Grupo Municipal Popular xa intentou que se crease esa oficina municipal para a dependencia e que se dese un impulso á tramitación destas axudas. A proposición, que se debateu en pleno o 5 de novembro de 2007, contou cos votos en contra do BNG e PSOE "un novo exemplo de que prima a coalición de intereses de partido sobre os intereses dos cidadáns". Nese sentido López Linares pide a socialistas e nacionalistas que "deixen á marxe os protagonismos de partidos e pensen nas persoas".