O Grupo Municipal Popular reclama ao equipo de goberno que acelere os trámites para precintar unha antena de telefonía móbil situada na parroquia do Burgo.
O concelleiro popular, Manuel López, pregúntase se a contundencia que anunciou a nova responsable de urbanismo para estes casos no pasado pleno foi simplemente un xesto de face á galería: "o Partido Popular denunciou o pasado mes maio que se estaba colocando, sen permiso, na parroquia do Burgo unha antena de telefonía móbil".
A semana pasada montábase o equipo electrógeno e toda a instalación da torreta, quedando preparada para entrar en funcionamento. Á vista de que o Concello "ou non se decatan, ou non se queren decatar, a pesar de que a instalación está na leira dun dos seus pedáneos", os populares reclaman que se actúe de inmediato para evitar que se poña en marcha. "Nin se molestaron en facer un seguimento desta instalación a pesar de existir unha denuncia pública".
