O Grupo Municipal Popular, facéndose eco das denuncias de usuarios da biblioteca municipal do Parque da Milagrosa, solicita que para o próximo verán o Concello manteña o horario de mañá e tarde nese centro cultural.

A concelleira popular Alicia Peña explicou que desde o 1 de xullo estas dependencias só están abertas entre as 9.00 ás 14:30, e apuntou que se descoñece cando se renovará o horario de tarde porque o cartel informativo da entrada non o especifica. En anos anteriores restablecíase a xornada de tarde a partir do 15 de setembro.

Alicia Peña lamenta que Lugo sexa a única cidade da provincia que restrinxe, nos meses de verán, este servizo: "é incomprensible que as instalacións estean pechadas nunha época na que a demanda é similar ou superior a que hai durante o ano, xa que hai moitas persoas que demandan este espazo para preparar oposicións, as convocatorias de setembro ou para utilizar o servizo de préstamo".