O Grupo Municipal Popular denuncia que a cidade de Lugo quedou, durante varias horas do día de onte, sen servizo de bombeiros. Enrique Rozas explicou que os efectivos de garda tiveron que atender unha chamada para sufocar un incendio dun taller en Friol.

O concelleiro popular considera moi grave que quede descuberto o servizo da capital e pregúntase, no caso de necesitar bombeiros para atender unha urxencia na cidade a quen se acudiría".

Nestes momentos o cadro de persoal dos bombeiros de Lugo está formado por 47 profesionais, e a media por quenda é de 6 efectivos, aínda que ás veces redúcese o número de efectivos: "Hoxe por exemplo só hai cinco de garda, e estes profesionais terán que atender o servizo 24 horas xa que a próxima substitución será mañá ás nove".

Enrique Rozas pediulle ao Concello que se tome en serio a dotación de persoal tanto para este corpo como para o da policía local xa que as previsións para o próximo ano son "de xeito evidente insuficientes". O concelleiro popular indicou que a finais deste ano está previsto que se xubilen tres bombeiros, e en 2009 causará baixa por este mesmo motivo outro profesional. O Concello só previu sacar a concurso dúas prazas, e as once restantes corresponden aos interinos que actualmente prestan servizo no cuartelillo de bombeiros.