O Grupo Municipal Popular defenderá, no próximo pleno, unha proposición para dotar á cidade dunha sinalización turística e cultural idónea e uniforme nas súas entradas e no propio centro urbano.

Os populares pídenlle ao Concello que faga as xestións oportunas ante das administracións competentes para que se coloquen paneis nas principais entradas da cidade co lema "Muralla Romana de Lugo, Patrimonio da Humanidade".

O Grupo Municipal Popular tamén solicitará que, no marco das súas competencias, o Concello instale sinalizacións idóneas que indiquen aos que nos visitan a existencia da "Muralla Romana de Lugo, Patrimonio da Humanidade".

Empezar polo máis próximo.-

O portavoz do Grupo Municipal Popular, Joaquín García Díez, explicou que salta á vista que "é moi pobre a información visual que se dá ao turista que accede á cidade". Por isto solicita "un esforzo por parte do Concello para que se vexa reflectido o que se pode ver en Lugo colocando máis sinais informativos coa lenda "Muralla Romana de Lugo, Patrimonio de la Humanidade"".

Na iniciativa do PP reclámase que se habilite unha partida nos orzamentos das administracións competentes para colocar estes paneis informativos nos accesos a Lugo, e para que se manteñan correctamente nos próximos anos.

Mentres non se materialicen estes acordos o grupo popular propón que se contrate un número suficiente de valos publicitarios en puntos visibles para colocar carteis, cun deseño rechamante, en que se promocione a muralla romana.
Joaquín García Díez: "Traer turistas a Lugo de lonxe é moi importante, pero tamén o é informar ás persoas que pasan pola Autovía A-6, por exemplo, de que se fan un alto no seu camiño poden ver un monumento Patrimonio da Humanidade".

Fai xa un ano que o Grupo Popular denunciou a deficiente sinalización turística da cidade. En vista do pouco interese demostrado polo equipo de goberno decidiuse presentar esta iniciativa.