O Grupo Municipal Popular presentou esta mañá un escrito no que solicita a convocatoria urxente da comisión de tráfico coa idea de que se analicen neste foro medidas específicas para controlar os excesos de velocidade dentro do centro urbano, e dunha maneira especial na Rolda da Muralla.

Enrique Rozas proporá que se fagan programacións concretas de controis de radar e de alcoholemia, xa que na actualidade estas probas fanse de forma aleatoria.

O Grupo Popular critica a ausencia dunha planificación real destes controis: "é paradoxal que nin o propio xefe de servizo nalgúns casos coñeza onde están os efectivos que realizan as probas". Os populares insisten en que a planificación dos controis de velocidade e alcoholemia debe contemplar os días, as horas e os lugares onde se instalarán os dispositivos.