• García Díez:"A tímida e tardía consulta por carta ás asociacións sobre as prioridades para cada barrio non satisfai as condicións que marcou o PP para apoiar os orzamentos de 2008".
• O Grupo Municipal Popular defende aos veciños como codecisores do destino dunha parte das previsións de gasto.
• Cristina Ares quéixase da retardación e nula publicidade do proceso de reforma do Regulamento de Participación Cidadá.

O portavoz do Grupo Municipal Popular, Joaquín García Díez, presentou hoxe unha iniciativa para debater no próximo pleno para que na elaboración dos futuros orzamentos, o Goberno Municipal aplique o mecanismo coñecido como "orzamentos participativos".

Esta decisión implicaría: dar a debida publicidade ao novo instrumento participativo antes do verán; e, a fin de que se poidan valorar todas as propostas cidadás e emitir os informes técnicos con anterioridade ao mes de decembro, iniciar o proceso correspondente á definición das previsións de gasto para o exercicio 2009 durante a primeira semana de outubro de 2008.

Os "orzamentos participativos" garanten que se teñan en conta as demandas veciñais á vez que converte ao veciño en codecisor do destino dunha parte das previsións de gasto.

García Díez lembrou como a participación do movemento veciñal á hora de priorizar gastos foi un dos requisitos que marcou o PP para apoiar os orzamentos de 2008. O portavoz popular advertiu "que até agora Orozco e o seu equipo limitáronse a realizar unha tímida e tardía consulta epistolar ás asociacións que pouco ten que ver coa filosofía de ampliar a participación cidadá".