A presenza de roedores en determinados puntos da cidade, como o parque do Sagrado Corazón ou nas proximidades do Centro de Saúde deste barrio, ou ata en rúas tan céntricas como a Avenida de Coruña, provocan a preocupación de veciños que trasladaron a súa inquietude ao Grupo Popular.

Á vista destas denuncias, a concelleira popular, Sofía López Linares, propón que, xa que no mes de xullo vence a concesión coa empresa que se encarga deste traballo, introdúzanse unha serie de modificacións no prego de condicións encamiñadas a mellorar as prestacións do servizo de desratización, desinfección e desinsectación.

A edila popular propón dúas vías de acción:

1. Creación dun mapa de incidentes que sinale as zonas de grao leve, moderado, grave ou moi grave: Pídese a introdución no prego de condicións dunha avaliación tras cada unha das dúas campañas de choque programadas en xaneiro e no verán. Estes datos permitirán a elaboración dun mapa de incidencias da presenza de roedores, e en función desas zonas de gravidade, poderase aumentar a periodicidade de actuación nestas áreas.

2. Crear zonas de "prioridade 1": a idea é que se intensifique a exterminación de roedores nas contornas dos centros de saúde, colexios e parques públicos, así como outras zonas en función da súa sensibilidade aos roedores

O custo do servizo de desratización, desinfección e desinsectación do Concello é de 30.000 euros anuais, aos que se suman os 1.687 euros mensuais destinados exclusivamente á desratización. A concesión coa empresa Sanal caduca o próximo 27 de xullo.