O Grupo Popular esperará a analizar o informe que hoxe se encargou aos técnicos municipais para pronunciarse sobre o sistema de adxudicación das casetas e caldeiros do polbo de San Froilán.

Alicia Pena lamentou "a tensión que se produciu esta mañá na reunión cos hostaleiros" e culpou a Orozco e o seu equipo "pola desidia e deixamento coa que abordan este tema, xa que secuestraron, desde o mes de outubro de 2007, un escrito dos hostaleiros no que pedían que analizasen este punto. O que tiñan que facer era polo sobre a mesa no momento de coñecelo", puntualizou a concelleira popular.

Pena tamén destacou que aínda que tarde, a reunión de hoxe foi positiva "xa que as festas están ao virar a esquina e hai que dar unha solución rápida ao conflito".

Comisión do rueiro.-

Por outra banda, o Grupo Municipal Popular tamén solicitou a través de Alicia Pena, unha reunión urxente da Comisión do Rueiro que quedou aprazada, sen data, a finais do mes de febreiro.

A edila popular considera "lamentable" esta demora: "tivo que ser o grupo popular o que presionou para que se reunise a comisión que levaba sen convocar desde o 29 de marzo de 2004. En febreiro fíxose a reunión na que se acordou que cada grupo e a federación de veciños entregase as súas propostas para designar as rúas sen placa. O Concello convocou en marzo unha segunda reunión que foi suspendida o día anterior e desde entón non sabemos nada".

O Grupo Municipal Popular considera que mes e medio é tempo dabondo para facer unha simple convocatoria. Pena cre que Burgo debería esforzarse para axilizar esta situación.

Alicia Pena insiste en que "unha cousa tan simple como carecer de placa identificativa na rúa onde vives ou tes un negocio, provoca problemas por exemplo o da recepción do correo que é case imposible".