• Concelleiros do grupo popular fixeron unha viaxe nun tren rexional para presentar esta iniciativa.

Un vagón do tren rexional que fai o traxecto A Coruña-Lugo foi o escenario da rolda de prensa do portavoz do Grupo Municipal Popular no Concello de Lugo. Joaquín García Díez xunto a varios concelleiros do seu grupo explicou que no pleno do próximo luns defenderá unha proposta encamiñada a potenciar os trens de proximidade e para que se poña en marcha un servizo diario diúrno a Madrid, en ambos os sentidos, como existiu no pasado.

García Díez subliñou que o que se pide é que se incrementen progresivamente as frecuencias dos trens Lugo-Monforte e Lugo A Coruña. " Non pedimos milagres da noite para a mañá pero queremos conseguir como mínimo as mesmas frecuencias que teñen os autobuses de liña. Cos servizos que hai estamos obrigando aos lucenses a que utilicen o seu vehículo particular ou que viaxen necesariamente en autobús".

"Con esta viaxe queremos simbolizar cal é a situación das infraestruturas de comunicación de ferrocarril nesta provincia. O PP non renuncia á alta velocidade, pero tal e como van as cousas Lugo vai ser a única capital de provincia que nun horizonte razoable non vai ter AVE", subliñou Barreiro.