| |
García Díez consegue o compromiso de Orozco para que escoite e teña en conta as prioridades do movemento veciñal á hora de priorizar obras nos barrios |
04/02/2008 |
|
| |
-
O portavoz do Grupo Municipal Popular solicitou esta mañá, nunha entrevista co Alcalde, que cumpra os seus compromisos e dea audiencia a estes colectivos para avanzar no desenvolvemento dos orzamentos.
-
As xestións para acondicionar en Rubiás o circuíto de velocidade iniciaranse en breve grazas ás condicións impostas polos populares cando deron o seu apoio aos orzamentos.
|
| |
O portavoz do Grupo Municipal do Partido Popular, Joaquín García Díez, entrevistouse esta mañá co Alcalde de Lugo coa idea de avanzar no desenvolvemento dos orzamentos para este exercicio.
De momento o Partido Popular conseguiu o compromiso de Orozco para que se convoque unha reunión coas asociacións veciñais para que, antes de repartir os investimentos para arranxos e urbanizacións de rúas, se escoiten e se teñan en conta as opinións dos veciños e deste xeito marcar as prioridades de cada barrio.
Joaquín García Díez xa avanzou que esta mesma semana o seu grupo manterá un encontro con asociacións do movemento veciñal para obter información de primeira man das demandas que consideran prioritarias para cada barrio.
|
“Considero que unha vez aprobados os orzamentos o primeiro que se debe abordar son as obras de urbanización que se van a acometer na cidade e parroquias e para iso é imprescindible escoitar a voz dos seus representantes”. |
|
Circuíto de motocrós.-
García Díez tamén indicou que de inmediato se iniciarán os contactos cos veciños de Rubiás co fin de utilizar o monte veciñal para a construción do circuíto de motocrós. O proxecto que defende o Grupo Popular é construír nun espazo de 20.000 metros cadrados un circuíto pechado cunha lonxitude de 2.000 metros e cun ancho de entre 8 a 10 metros.
Estas instalacións poderían acoller sen problemas probas de nivel provincial e autonómico. O Concello tería na súa man a posibilidade de dotar a este circuíto de motocrós das infraestruturas necesarias para que nun futuro ata poida albergar campionatos nacionais. Tamén servirían para a práctica do car-cros e o uso de Quads.
Outro proxecto que se puxo sobre a mesa na reunión desta mañá entre García Díez e Orozco foi o da gardería do CEAO, que se podería construír nunha parcela de titularidade municipal para evitar atrasos no cumprimento deste compromiso que o Goberno Municipal asumiu a instancias do PP na aprobación dos Orzamentos do Concello para o 2008.
|
