• Barreiro subliñou que estas arengas teñen "marca de identidade propia: incumpren todo canto din"

O Presidente Provincial do Partido Popular, acusou aos dirixentes socialistas de utilizar actos institucionais para pronunciar "panfletos propagandísticos das promesas que non conseguen facer".

Barreiro destacou que o discurso de onte de Touriño, no acto do trixésimo aniversario da CEL, tiña "a marca de identidade do PSOE". A xuízo de José Manuel Barreiro é unha falta de respecto e un insulto para todos os lucenses e para todos os galegos que o Presidente da Xunta veña a Lugo, invitado a un acto institucional dunha entidade privada, e faga "un mitin en toda regra no máis puro estilo socialista: todo canto din non é verdade".

Para o Presidente Provincial esta actitude non é casual senón que é algo sistemático que se repite en todos os actos institucionais "ao máis alto nivel e de forma reiterada e continua".

Esta situación "está chegando a límites que non son fáciles de aguantar" puntualizou Barreiro, quen animou aos lucenses a rebelarse contra os políticos que faltan á verdade e "que se negan a explicar os motivos polos que non fixeron as cousas que eles mesmos comprometeron". "Esta cidade ten que reaccionar" puntualizou.